Акцыя маўчання б'е антырэкорд!

Сёння ў Светлагорску прайшла штотыднёвая акцыя нязгодных з эканамічнай і палітычнай сітуацыяй у краіне. На Цэнтральнай плошчы горада сабралася 12 чалавек (без уліку непаўналетніх). Гэта самая малалікая акцыя за ўвесь час іх правядзення ў Светлагорску.

Упершыню колькасць міліцыянтаў, якія назіралі за падзеямі паводаль, перавысіла колькасць саміх мітынгоўцаў. Амаль па цэнтры плошчы быў прыпаркаваны аўтазак. Падзеі асвятлялі дзве “здымачныя групы” праваахоўных органаў.

Акцыя маўчання праходзіла ў звычайным фармаце – моўчкі. У адрозненне ад папярэдніх разоў, на плошчу выйшлі пераважна людзі старэйшага ўзросту. Сярод іх былі заўважаны настаўнікі сярэднеадукацыйных школ. Як заўсёды, абышлося без затрыманняў. Напрыканцы мерапрыемства прагучалі традыцыйныя апладысменты, пасля чаго мітынгоўцы разышліся.

Маўклівыя акцыі праходзяць у розных гарадах краіны кожную сераду. Такі незвычайны пратэстны рух зарадзіўся ў сацыяльных сетках інтэрнет. Галоўная зброя “рэвалюцыцянераў” – гэта апладысменты. Апладысменты ўсім тым, хто адказны за валютны, эканамічны і палітычны крызіс у Беларусі.

Акцыя маўчання

У той жа час каля крамы на галоўнай вуліцы

Ці выйдзе сёння моладзь ПАМАЎЧАЦЬ?

Традыцыйныя акцыі маўчання плануецца правесці сёння ў многіх гарадах краіны. Ці выйдзе светлагорская моладзь на плошчу ў чарговы раз?

Пасля жорсткага разгону дэманстрантаў на Дзень Незалежнасці ў Мінску і ў некаторых раённых цэнтрах Беларусі, здавалася, на мірных акцыях пратэсту можно паставіць крыж, але арганізатары "мерапрыемства" не намераны здавацца загадзя. За апошнія суткі быў распрацаваны новы план дзеянняў, які дазволіць пазбегнуць неапраўданых затрыманняў у Мінску. Для рэгіёнаў план дзеянняў мяняць не сталі.

Кожную сераду а 19-й гадзіне ў многіх гарадах Беларусі праводзяцца "акцыі маўчання" супраць палітычнай і эканамічнай сітуацыі ў краіне. Мітынгоўцы выказваюць свой пратэст гучнымі апладысментамі.

У Светлагорску людзі збіраліся тры разы, і з кожным разам колькасць дэманстрантаў павялічвалася. На апошнюю акцыю 29 чэрвеня на Цэнтральную плошчу горада выйшла каля 80-ці чалавек. Мясцовыя ўлады ў гэты вечар арганізавалі рэпетэцыю да Дня Незалежнасці, каб перашкодзіць правядзенню мірнай дэманстрацыі. Такія паводзіны чыноўнікаў былі сустрэты авацыямі мітынгоўцаў.

Запланаваная на 3 ліпеня падобная акцыя не адбылася з-за святочнага мерапрыемства на галоўнай плошчы.

Пад час акцый ў Светлагорску нікога пакуль не затрымлівалі, хаця супрацоўнікі спецслужб заўсёды прысутнічаюць і здымаюць усё, што адбываецца на відэа.

Рабочыя "ХІМВАЛАКНО" больш не чытаюць дзяржаўную прэсу

Стала вядома, што працаўнікі "Хімвалакно" з ліпеня не атрымліваюць у паштовыя скрыні дзяржаўныя газеты, на якія яны падпісваліся раней.
Справа ў тым, што адміністрацыя завода не паспела аплаціць падпіску.
Некаторыя працаўнікі абураны такой безадказнасцю адміністрацыі, таму што дзяржаўныя газеты для многіх з'яўляюцца адной з галоўных крыніц інфармацыі.
Пакуль што справа застаецца невырашанай, а таму, верагодна, што і ў жніўні працаўнікі не дачакаюцца сваіх "любімых" выданняў, на якія ў абавязковым парадку прымушаюць падпісвацца ўсіх начальнікаў завода...